KALIBO, Aklan—Nagnaba ro numero mga turista nga nagbakasyon sa isla it Boracay sa unang daywang buean it presenteng dag-on.
Raya hay kasunod sa travel restriction nga ginpatuman it gobyerno sa mga nasyong may pinakamaabong kaso it mga tinamaan it coronavirus disease (COVID-19).
Base sa record it Municipal Tourism Office it Malay, Aklan, bumagsak it 40 porsyento ro tourist arrival sa isla sa unang daywang buean kon ikumpara ko nagtaliwan nga dag-on.
Nakalista ro taeatapan it 103,834 nga tourist arrival para sa buean it Enero halin sa dating 172,695 samtang ko raya nga Pebrero hay 490 visitors eamang ro nailista nanda halin sa 59,768 arrivals sa kaparehong buean ko 2019.
Kaangot kara, ginapahauman eon it lokal nga gobyerno ro maeagkuang event sa pagbalik it Love Boracay agud makaengganyo it domestic tourist nga mapun-an ro pagkaduea it mga dumueoong turista partikular it mga Chinese ag Koreans.
Samtang, gin-anunsyo ni Tourism Secretary Berna Romulo-Puyat nga unang pagabisitahon ni Pangueong Rodrigo Duterte sa March 12 ro nasambitang isla agud maipakita sa tanan nga eowas adtunan ro isla ag nagapabiling “coronavirus free”.
