KALIBO, Aklan—Nagpadumdom ro barangay council it Manocmanoc, Boracay sa mga residente nga maging accomodating kasunod it overwhelming nga pagtaas it tourist arrival sa isla it Boracay ko nagtaliwan nga buean it Mayo.
Suno kay punong barangay Nixon Sualog, kinahang-ean sigon nanda ro kooperasyon it mga residente, workers ag negosyante sa uman nga paglobo it domestic tourist agud nga inde sigon ro mga raya mamadla nga magbalik it uman sa ginakabig makaron nga numero unong tourist destination nga una sa listahan it mga turista pagkatapos it haeos daywang dag-on nga pandemya.
Nagpadumdom dugang raya sa mga residente ag maging sa mga turista nga maging responsable sa andang mga kalhit partikular sa front beach bangud nga nataeopangdan nga maskin may mga nakabalandra nga basurahan hay may nakakalhit gihapon nga mga plastic bottles ag cups sa mga binit-binit.
