Ginmandu ni US President Donald Trump ro insigidang pag-umpisa it US Navy it blockade sa Strait of Hormuz matapos mapas-eawan ro paghaeambaeang pangkalinungan it US ag Iran nga nagatuyo nga tapuson ro giyera ag magpadayun ro temporaryong ceasefire.
Sa anang post sa Truth Social, ginpahayag ni Trump nga pagabaeabagan it US ro tanan nga barko nga magasueod ukon magaguwa sa nasambit nga aeagyan it langis sa international waters.
Dugang pa nana nga ginmanduan man kara ro US Navy nga baeabagan ro mga barkong gina-alegar nga nagabayad it “toll” sa Iran, ag paga-umpisahan man ro pagguba sa mga mina nga gintanum sa nasambit nga lugar.
Nagpaandam man si Trump kontra sa Iran, kadungan it grabeng paandam engkaso nga umatake raya sa US ukon mga sibilyang barko.
Nauna eon nga ginpahayag ni US Vice President JD Vance nga napas-eawan ro peace talks bangud nga owa ginbaton it Iran ro US conditions, kaibahan ro pagtalikod sa andang nuclear ambitions.
Sa parte man it Iran, ginpahayag ni Parliamentary Speaker Mohammad Baqer Qalibaf nga owa nagakumpiyansa ro US sa mga ginatanyag nga solusyon it Tehran.
Ginpamilit it Iran, kaibahan sa andang mga hinyu ro kontrol sa Strait of Hormuz, war reparations, ag pagduea sa sanctions.
Padayun gihapon ro tensyon sa Middle East samtang nagapabilin nga owa naresolba ro isyu sa importanteng aeagyan it langis sa Strait of Hormuz nga gina-agyan it kapin sa 20% it pangkalibutanon nga supply it enerhiya.
