KALIBO, Aklan—Uman nga nadugangan ro mga kumpirmadong kaso it Coronavirus Disease 2019 ukon COVID-19 sa probinsya it Aklan.
Raya hay sangka 31-anyos nga eaeaki nga Authorized Person Outside Residence ukon APOR.
Base sa official statement nga ginpaguwa it Aklan Provincial Health Office, nag-abot sa probinsya ro pasyente ko Agosto 21, 2020 sakay it sangka RoRo vessel via Caticlan kung sa siin presente rayang naka-quarantine sa Provincial Quarantine Facility.
Sa makarun naga-abot eon sa 32 ro kumpirmadong kaso it COVID-19 sa probinsya kung sa siin an-om kara ro nagapabilin nga aktibo samtang 25 ro nakarecover matapos ro pagbueong ag quarantine procedure.
Kaangot kara, nagapabilin man sa Modified General Community Quarantine (MGCQ) ro Aklan kon sa siin hugot sa gihapon ro padumdom it gobyerno nga sundon ro ginapatuman nga minimum health protocols kaparehas it mandatory nga pagsuksok it facemask, pagsuksok it face shield kon nagasueod sa mga establisyimento komersyal ukon nagasakay sa mga pampublikong saeakyan, pag sanitize ukon paghugas it alima ag bilog nga eawas kamana man pag-obserba it physical distancing agud nga malikawan ro nasambit nga sakit.
