POLICE Report — Makasueubo ro gindangatan it 14 anyos nga dalagita nga nasapwan nga bangkay pilang adlaw matapos mapabalita nga missing sa Panabo City, Davao del Norte.
Suno sa report it Panabo City Police Office, Pebrero 28 kat maduea ro Grade 9 student nga si “Maloi”, kun sa siin, ulihi raya nga nakitang buhi paguwa it andang eskwelahan.
Sa bulig it mga testigo, nausoy it kapulisan ro ulihing naka-ibahan it biktima nga nakilaeang si Mark Paltinca Bernabe, mismong ama-amahan it dalagita.
Ginasugid nga owa ro ina it biktima kat matabu ro krimen bangud nga raya hay nagatrabaho sa ibang nasyon bilang OFW.
Sa ginpatigayon nga imbestigasyon, nakita ro bangkay ni Maloi sa eugta nga ginapanag-iyahan it suspek.
Ko ulihi hay nag-aku mismo si Bernabe nga imaw ro pumatay ag nag-eubong sa dalagita.
Ginapatihan nga ginhimuslan man ro biktima antes nga gin-eubong it anang stepfather.
Ginpahayag pa it kapulisan nga nagdangop kanda ro matuod nga ama it biktima nga si Gerry Borrasca para i-report nga ko February 28, 2025 hay naduea sigon ro anang unga nga dalagita.
Nakakulong eon makaron ro suspek sa kustodiya it Panabo PNP ag padayun pa ro imbestigasyon angot sa ginasugid nga pagpanghimueos ag pagpatay.
