Ginatun-an it Commission on Elections (Comelec) ro uman nga pagbukas it voter registration para sa 2028 national ag local elections pag-abot it Pebrero 2027.
Suno kay Comelec chairperson George Erwin Garcia, natalakay eon it poll body ro target nga iskedyul matapos ro pagtapos it pitong buean nga voter registration para sa Barangay ag Sangguniang Kabataan Elections (BSKE) nga nakataeana sa Nobyembre 2, 2026.
Gin-engganyo nana ro mga nakaparehistro nga panipuslan ro masunod nga registration period eabi eon para sa ginakabig nga pinaka-importante nga 2028 presidential ag vice presidential elections.
Suno sa Comelec, nag-abot eon sa 5,470,889 aplikasyon ro andang naproseso umpisa nga ginpatigayon ro voter registration ko Nobyembre 20, 2025.
Nagpanguna ro Calabarzon sa may pinakamaabung naprosesong aplikasyon nga 887,677, kasunod ro Central Luzon nga may 613,185 ag National Capital Region nga may 598,427. Pinakamanaba man ro Cordillera region nga may 75,822 aplikasyon.
Mag-eowas sa mga bag-ong botante, nagbaton man ro poll body it mga aplikasyon para sa transfer ag reactivation.
Ginpahayag man ni Garcia nga nagapadayun ro overseas voter registration hasta sa Setyembre 30, 2027, ag gin-engganyo ro mga Pilipino sa abroad nga tempranong magparehistro pinaagi sa satellite ag “register anywhere” programs.
Samtang, ginkumpirman ni Garcia nga nakabaton ro Comelec it sueat halin sa House of Representatives angot sa bakanteng puwesto matapos mag-resign si Pinoy Workers party-list Rep. Franz Legazpi.
Ginahueat pa sigon it poll body ro separadong deklarasyon it vacancy matapos man nga mag-resign si 1 Tahanan party-list Rep. Nathaniel Oducado.
