Ginbasoe ni Vice President Sara Duterte si Pangueong Ferdinand Marcos Jr. sa ginasugid nga padayun nga kinagamo ag pagtunga-tunga sa Senado, nga suno kana hay nagasaeaming sa pagdumaea it administrasyon.
Suno kay Duterte, may tensyon makaron sa tunga it daywang bloc sa Senado, sangka grupo nga ginapamunuan ni Senate President Pro Tempore Sherwin Gatchalian bilang presenteng mayorya, ag sambilog pang grupo nga ginapangunahan ni Sen. Alan Peter Cayetano nga gina-insister sa gihapon ro anang pag-angkon sa posisyon bilang Senate President.
Kadungan kara, gin-engganyo nana ro Senado nga ayuson ro andang owa pagka-ilintindihan ag tutukan ro andang obligasyon sa idaeum it 1987 Constitution.
Dapat sigon nga magpueong ro tanan nga 24 nga senador, kaibahan ro mga nakadetine ag mga nagapanago agud nga istoryahan kon ro mga prayoridad it andang institusyon ag kun ano ro andang mga obligasyon base sa Konstitusyon.
Sa pangutana kon ginakilaea nana si Gatchalian bilang Senate leader ag kun may quorum sa pagkabutang kana, ginpahayag ni Duterte nga ro Korte Suprema ro dapat magdesisyon sa nasambit nga isyu.
