Ginpasaka it World Health Organization (WHO) sa “very high” ro peligro it pag-grabe it outbreak it Bundibugyo strain it Ebola sa Democratic Republic of Congo (DRC).
Suno kay WHO Director-General Tedros Adhanom Ghebreyesus, nagapabilin nga mataas ro posibilidad nga madasig pang magkalhit ro virus sa sueod it nasyon, samtang “high” man ro risk sa rehiyon ag “low” sa pangkalibutanon nga lebel.
Ro Bundibugyo strain hay sangka klase it Ebola nga owa pa it aprubadong bakuna ukon sigurado nga bueong sa makaron.
Sa pinaka-ulihi nga data, kapin sa 82 eon ro kumpirmadong kaso sa Congo, kaibahan ro pitong kumpirmadong namatay. May una man nga masobra sa 170 nga ginadudahan nga mga namatay ag haeos 750 suspected cases nga padayun nga gina-imbestigahan.
Sa Uganda man, daywang kaso eon ro nakumpirma halin sa mga biyaherong halin sa Congo, kun sa siin sambilog kara ro namatay.
Suno sa WHO, epektibo sigon sa Uganda ro hugut nga contact tracing ag pagkansela it mabahoe nga pagtililipon agud nga mapugngan ro pagkalhit it sakit.
Ginkumpirman it WHO nga sangka American national nga nagatrabaho sa Congo ro natapnan it virus ag ginsaylo sa Germany para magpabueong. May sambilog pang Amerikanong posibleng exposed sa virus nga ginsaylo man sa Czech Republic.
Samtang, ginpahayag it WHO nga ginatun-an eon nanda ro paggamit it experimental antiviral drug nga Obeldesivir bilang posibleng pangsukoe sa Ebola, maskin nga kinahangean pa raya nga gamiton sa idaeum it hugut nga protocol.
Suno sa mga health expert, posibleng daywang buean eon nga nagakalhit ro outbreak bago raya opisyal nga gindeklara rason nga padayun pa gihapon ro nagataas nga numero it kaso samtang gina-eagas it mga awtoridad ro pagpugong sa pagkalhit it virus.
