Makakilibot ro nangin resulta it una nga hampang sa Group H sa FIFA World Cup 2026 kat nagtapos sa 0-0 draw ro matchup it 2010 World Champions nga Spain ag debutant nga Cape Verde.
Ginpatigayon ro hampang sa Mercedez Benz Stadium sa Atlanta, USA ag nagtapos alas-2:00 aga-aga it Martes, Philippine Time.
Gindominar it world no. 3 nga Espanya ro match nga may 21 shots para sa goal apang owa raya tanan nakaeusot sa 40-anyos nga si Vozinha nga nagatindog bilang goalkeeper it maisot nga island nation.
Bisan ro Barcelona winger ag sambilog sa highest-profile players sa tournament nga si Lamine Yamal nga may injury apang ginpasueod bilang substitute sa 70th minute ro owa man it nahimo para sa anang team agud nga maka-score it goal.
European powerhouse ro Espanya, kun sa siin sanda ro nagkampyon sa FIFA World Cup ko 2010. Raya eon ro andang ika-17 nga appearance sa World Cup ag naga-target nga makabawi makaron nga dag-on matapos napiyerde sa Round of 16 ko 2022 sa Qatar.
Nagapang-64 man sa ranking ro Cape Verde ukon Cabo Verde — ro second-lowest-ranked team sa 10 nga African representatives sa World Cup makaron nga dag-on. Raya eon ro andang kauna-unahan nga pagtapak sa World Cup.
Mag-eowas sa Cape Verde ag Spain, naga-compete man sa Group H ro two-time FIFA World Cup champion nga Uruguay ag Saudi Arabia nga nagpiyerde sa defending champion nga Argentina sa group match ko 2022.
