KALIBO, Aklan — Emosyunal nga naga apela ro sangka babaye sa andang 48 anyos nga ina nga aywan eon ro anang kabit ag magbalik sa poder it andang 72-anyos nga ama.
Personal nga nag-agto sa Bombo Kalibo ro mag-ama agud nga ipaabot ro andang panawagan sa andang ginakabig nga “ilaw ng tahanan.”
Suno kay alyas Monica it banwa it Makato nga naeo-oy imaw sa andang ama ag 8-dag-on nga kamanghuran nga manghud matapos nga gina-alegar nga gin-abandona it andang ina nga si alyas Thelma.
Makapilang beses sigon nanda nga ginsueang ro andang ina sa banwa it Madalag sa poder it eaeaki nga anang ginsundan, apang padayun raya nga nagapamalibad nga mag-uli.
Ginarason sigon it andang ina nga indi eon nana masarangan ag natak-an eon imaw sa andang malisod nga pagpangabuhi dugang pa nga masakiton ro anang mister.
Naeo-oy sigon sanda sa andang ama nga may sakit nga parkinsons disease bangud nga pirme raya nga nagatangis ag gina-usoy ro anang asawa.
Nasayuran nga 2009 hay naangkon it andang ama ro nasambit nga sakit.
Ginsaysay pa ni Monica nga sa batang edad nga siyam, nagakayod eon imaw para sa pamilya.
Aminado man imaw nga mabudlay guid man ro andang sitwasyon bangud nga napueo sanda nga magmaeanghud kun sa siin kaeabanan kanda hay owa nakatapos it pag-eskwela.
Nakaangkon sigon it relasyon ro andang ina sa anang kabit matapos nga parehong nagtrabaho sa sangka fish pond hasta nga nagsunod raya ko ulihi pauli sa baeay it eaeaki nga ginasugid nga manuglingkad, may daywang buean eon ro nagtaliwan .
Masakit pa sigon sa andang baeatyagon nga gina-deny it andang ina ro andang ama nga anang asawa ag ginapakilaea nana raya nga anang tiyo.
Raya eon suno kana ro ikaywang kahigayunan nga nagloko ro andang ina.
Ginpahayag ni Monica nga pito sanda nga magmaeanghud sa andang ama ag ro nabilin nga tatlo nga puro maisot pa hay unga it andang ina sa anang dating nakarelasyon.
Nagpa-ubos sigon ro andang ama ag pilit nga gin-intindi ro pagpang-eaeaki it andang ina agud nga indi sanda pag-aywan.
Apang, kat namatay ro anang kalaguyo hay uman raya nga nagloko ag nagsunod eon man sa ibang eaeaki.
