Sangka 11-anyos nga ungang eaeaki sa Canada ro namatay bangud sa rabies pilang domingo matapos nga dapu-an it kuyapnit sa anang itsura samtang imaw hay nagakatueog.
Suno sa Canadian Medical Association Journal, natabu ro insidente ko summer it 2024 sa Ontario, Canada, kun sa siin sangka kuyapnit ro nag-agto sa itsura it unga samtang imaw hay nagakatueog sa sangka cottage.
Ginwahing sigon it unga ro kuyapnit ag insigidang nadakpan apang ko ulihi hay ginbuhi-an it anang ama.
Bangud nga owa it nakitang inangkitan ukon nina, owa eon sanda nag-agto sa ospital ukon nagpakonsulta.
Pagkataliwan it kapin sa tatlong domingo, nag-umpisa nga maka-eksperyensiya ro unga it pagmanhid sa itsura, naduea-an it gana sa pagkaon, ag nagpanghaeok.
Ko ulihi hay nag-grabe ro anang kondisyon ag nakaangkon imaw it kabudlay sa pagtueon, hallucinations, ag grabeng pag-eaway.
Ginkumpirma it mga doktor nga imaw hay may rabies. Sa pihak it pagbueong sa ospital, nag-grabe pa ro anang kahimtangan ag ko ulihi hay binawian it kabuhi 17-diyas matapos ma-admit sa ospital.
Nasayuran nga raya ro unang kaso it rabies sa Ontario umpisa ko 1967.
Padumdum it mga eksperto, ro rabies hay makamaeatay kon magtuhaw eon ro mga sintomas, apang pwede raya nga malikawan kon makabaton eagi it tamang bakuna matapos ro posibleng exposure sa sapat nga may rabies.
Gin-insister pa nga maskin nga owa it nakitang inagkitan, dapat nga insigidang magpatan-aw kon nakaangkon it direktang contact sa kuyapnit bangud nga posibleng may maisot raya nga nina nga owa nataeupangdan.
