KALIBO, Aklan—Igarekomenda it barangay council it Caano, Kalibo sa lokal nga gobyerno it Kalibo nga mataw-an it housing unit ro nabilin pa nga mga residente nga naga-istar maeapit sa kilid it baybay sa nasambit nga lugar.
Raya ro ginpahayag ni punong barangay Vic Mandal kasunod it pagkasamad it 11 nga kabaeayan sa naeksperyensiyahan nga rouge wave ukon mga mabahoe nga humbak ko nagtaliwan nga adlaw it Lunes it aga-aga bangud sa amihan.
Suno kay kapitan Mandal nga pila sa mga naga-istar sa lugar hay nataw-an eon it housing unit sa Brgy. Nalook , apang may nabilin nga iba pa nga owa naka-avail.
Aminado imaw nga peligroso eon nga mag-istar sa nasambit nga lugar bangud sa climate change.
Nasayuran nga pito ro totally damaged, ap-at ro partially damaged samtang 11 nga iba pa nga baeay ro ginsoe-ob it tubi-dagat.
Mag-eowas kara, nakalista man it tatlong baroto ro nasamad ag 12 nga fish pond ro nag-awas nga nagtuga it kapiyerdihan sa nagapanag-iya.
Dugang pa ni kapitan Mandal nga puro himo sa light materials ro nasambit nga mga kabaeayan rason nga owa nasarangan ro mga mabaskog nga humbak.
Nadaeasa man ro andang mga gamit ag owa nanda nasalbar.
Pag abot sigon nanda sa lugar hay nakasaylo eon ro mga apektadong residente sa eowas nga lugar .
Gintaw-an man sigon sanda it bulig kapareho mga food packs ag trapal.
Sa pihak nga parte, nagpadaea eon sigon ro Department of Social Welfare and Development ukon DSWD Region 6 it mga tawuhan agud nga mag-validate sa mga apektadong pamilya.
