Hugut nga igabawae ro paggamit it social media sa mga unga nga owa pa it 13 anyos samtang pagapapanaugan it multang hasta sa P50 milyon ro mga platform nga maga-eabag.
Raya hay sa oras nga mapabakod ro House Bill No. 9965 ukon proposisyon nga Children’s Social Media Safety Act nga ginaduso nanday House Speaker Faustino “Bojie” Dy III ag Majority Floor Leader Ferdinand Alexander “Sandro” Marcos nga nagatuyo nga mapatuman ro komprehensibong regulasyon sa paggamit it social media sa mga menor-de-edad.
Sa idaeum it proposisyon, indi pwedeng maghimo, magpabilin ukon gumamit it anumang social media account ro mga unga nga 12 anyos panaba.
Samtang, ro mga naga-edad it 13 hasta nga owa pa it 18 hay pagapasugtan nga maggamit it social media kun may pahanugot it ginikanan ukon legal nga tagapag-alaga, ag kinahangean nga regular nga kumpirmahon it mga platform ro edad ag pahanugot.
Sa oras nga pagabawi-on ro pahanugot, awtomatikong paga-limitahan ukon igasuspinde ro account it unga.
Mag-eowas sa age restriction, hugut man nga ginabawae ro mga algorithm nga nagaduso it makahaealit nga content, pati eon ro nagapataeang nga disenyo it platform ag AI-generated content nga pwedeng magpakuno-kuno nga matuod nga impormasyon.
Sa isyu it penalidad, pagapapanaugan it multang P5M-P10M ro mga platform nga mapas-eawan nga maghueag kontra sa mga ginabawae nga account, samtang ro mas mabug-at nga pag-eabag hay may katumbas nga P20 milyon hasta P50 milyon. Kon pauman-uman ag seryoso ro pag-eabag, pwede pang ibawae ro operasyon it platform sa Pilipinas, sandig sa due process.
Base sa pagtuonl, ro sobra-sobrang exposure sa paggamit it social media it mga unga hay nagatuga it grabeng depresyon, kawad-an it kumpiyansa sa kaugalingon, kakueangan it tueog, cyber bullying, exposure sa mga peligroso nga content nga pwede nanda nga tuearon.
