Haeos 17,000 nga tawuhan it Philippine Coast Guard (PCG) ro igapakalhit sa mga pantalan sa bilog nga nasyon agud nga masiguro ro kaeowasan ag seguridad it mga biyaherong maga-uli sa andang mga probinsya para sa Undas 2026.
Suno kay PCG spokesperson Commodore Noemie Cayabyab, igapasaka sa heightened alert status ro taan nga operating units umpisa Oktubre 29 hasta Nobyembre 3 agud nga masiguro ro maayos nga daeagan it mga pasahero.
Igapahaum man ro mga rescue personnel, medic, nurse ag K9 units para sa emergency response ag inspeksyon kontra sa mga ginabawae nga bagay.
Magabutang man it passenger assistance desks ag pagapabaskugon ro koordinasyon sa Philippine Ports Authority, Philippine National Police ag iba pang ahensya agud nga mapabilin ro kaayusan sa mga pantalan.
Ginaeauman nga maga-abu ro mga biyahero sa pagdumdum it All Saints’ Day sa Nobyembre 1 ag All Souls’ Day sa Nobyembre 2.
