Ginkilaea it Guinness World Records ro 18-anyos nga si Nathan Thomas it Estados Unidos bilang pinakabatang propesor sa bilog nga kalibutan matapos imaw nga mag-umpisang magturo it computer programming sa Miami Dade College ko Agosto 2023 sa edad nga 18 years and 346 days.
Ginaturo ni Thomas ro kursong “C for Engineers” sa mga estudyanteng haeos kaedad nana, rason nga naeampasan nana ro dating rekord ni Colin Maclaurin nga naging propesor sa edad nga 19 ko 1717. Naeampasan man nana ro rekord ni Alia Sabur bilang pinakabatang babayeng propesor.
Bago pa man mag-19, natapos eon ni Thomas ro bachelor’s ag master’s degree sa Electrical Engineering. Nag-umpisa man imaw nga mag-eskwela sa kolehiyo sa edad nga 10 ag nagsaylo sa Florida International University kat imaw hay 14 anyos.
Sa makaron, nagabo-oe imaw it kursong abogasya sa University of Miami samtang nagapadayun sa pagturo online, nga may tuyo nga maging mayad pa gid sa intellectual property law. Sa pihak it anang mga kadaeag-an, nagapabilin imaw nga aktibo sa sports ag musika.
