Ginapaandaman nga i-dismantle ro ginabueubanta nga una sa 18 ka stalls sa kilid it karsada sa relocation site it Kalibo Public Market bilang kaparte it paglimpyo ag mas maeumo nga pag-agi sa lugar.
Suno kay Mary Gay Joel, Municipal Economic Enterprise and Development Office (MEEDO) Head it LGU Kalibo, nakipag-coordinate eon ro LGU-Kalibo sa Barangay Andagao ag sa mga tag-iya it stalls.
Gin-patawag ro mga tag-iya nga boluntaryong i-dismantle ro mga stall, partikular ro mga bakante ag uwa eon ginagamit.// Ginaplano sigon ro nasambit nga dismantling sa Biyernes ag Sabado, samtang ro mga stall nga aktibo pa nga ginagamit it mga vendor hay indi anay pagpiliton nga paeson tungod nga uwa pa it klarong relocation site.
Dugang pa nana, tuyo kara nga magtao it mas hueuga nga espasyo para sa mga kliyente, construction activities, electrical works ag pag-agi it mga saeakyan.
Ginpahanumdom man ro mga tag-iya it stall nga mag-coordinate sa LGU antes magdismantle ag magbuoe it mga materyales. Ginpaandaman man ro mga motorista nga likawan ro illegal nga pagparada sa lugar.
Samtang, padayon man ro implementasyon it “no segregation, no collection”policy sa merkado, bisan pa nga gin-ako it opisyal nga may mga vendor nga uwa pa naga-sunod kara.
Ginpahayag nga padayon ro koordinasyon it LGU ag Barangay Andagao ag ginapasaeamatan ro mga vendor nga boluntaryong naga-cooperate sa paglimpyo it lugar.
