KALIBO, Aklan — Naeumos-patay ro sangka 20-anyos nga eaeaki sa suba nga sakop it Brgy. Calangcang, Makato.
Ginkilaea ro biktima kay Kim Jordan Fernandez, residente it nasambitan nga lugar.
Base sa inisyal nga imbestigasyon it Makato Police Station, ginsugo ro biktima ku anang ina nga usuyon ro andang ayam nga nakaguwa it andang kurae.
Pag-abot it udto-adlaw, naka-uli sa andang panimaeay ro ayam apang owa ro biktima.
Owa man sigon magkahawag ro anang ina bangod sa barkador ag paeawarang ro biktima.
Makataliwan ro pilang oras nga owa sa gihapon maka-uli si Fernandez, ginpakamayad eon nga usuyon raya ku anang pamilya.
Sa bulig it andang chief tanod, nakita sa binit it suba ro tsinelas it biktima.
Bangod kara, gin-usoy nanda raya ag ku ulihi hay nakita eon ro eawas it biktima nga naga kueob sa madaeum nga parte it suba.
Insigida raya nga ginpatakas ag gintaw-an it first aid.
Apang sa owa it swerte, owa eon masalbar ro nasambitan nga biktima tuga it anang pagka-eumos.
Sangka doctor nga nag-agi sa lugar ro nagdeklara nga patay eon ro biktima.
Nasayuran nga may sakit nga epilepsy ro biktima kung siin raya man ro ginapatihan nga rason it anang pagka-eumos ku anang pamilya.
Samtang, sa makaron hay nagapadayun pa ro imbestigasyon it Makato PNP sa nasambitang insidente.
