KALIBO, Aklan — Owa pa it kasiguraduhan kun hin-uno matapos ro kaso ni dating President Rodrigo Duterte sa International Criminal Court (ICC) sa The Hague, Netherlands.
Ginpaathag ni Atty. Kaiser Cordero, sangka international lawyer nga sa idaeum it Article 61 it Rome Statute, may tatlong posibleng matabu sa pagtapos it anang confirmation of charges hearing sa Biyernes, Pebrero 27, 2026.
Una hay pwedeng i-confirm it Pre-Trial Chamber ro charges. Engkaso nga matabu hay insigida nga paga-umpisahan ro kaso sa Trial Chamber, kun sa siin dikara masayuran kon guilty beyond reasonable doubt si Duterte.
Ikaywa hay pwedeng indi i-confirm ro charges ag mabasura ro kaso ag makauli eon ro dating Pangueo. Apang may pangatlo pang option ro ICC nga pwedeng mag-adjourn ag taw-an it tsansa ro prosecution nga magtau it dugang nga ebidensiya.
Raya hay nagakahueugan nga pwede sanda nga magbalik ag mag-take-two bitbit ro mabaskog nga kaso.
Bangud kara, indi pa pwedeng makahilway si Duterte bukon it kapareho sa ibang kaso nga kon kueang sa ebidensya, dismissed ukon mabasura eagi, apang sa ICC, may kahigayunan pa ro prosecution nga ayuson ag pabaskugon ro andang kaso.
Samtang, ginpaathag pa nana nga ro ginatan-aw makaron sa ginapatigayon nga Pre-Trial Chamber hay kun may “substantial grounds to believe” nga may krimen ag may partisipasyon ro akusado.
Bukon pa sigon raya it final judgment nga guilty ukon acquittal.
