Ginaekspektar nga kapin sa 34 ka mga tribu ag grupo ro magapasakop sa Ati-Atihan sadsad contest sa paaeabuton nga Kalibo Sto. Niño Ati-Atihan Festival 2023.
Raya hay matapos nga maabo ro nagpabutyag nga makipagbahin sa pagbalik it face to face celebration it ginakabig nga Mother of All Philippine Festival.
Ginkumpirma ni Boy Ryan Zabal, chairman sa sadsad parade committee sa Ati-Atihan Festival 2023 nga gintaasan ro mga premyo it mga magadaog nga contestant ag uwa sigon it magauli nga eohaan bangud nga makabaton it consolation prizes ro mga mapyerde.
Ro mga tribu ag grupo nga nagparehistro eon para sa 2023 edition it Sadsad Ati-Atihan Contest hay maghalin sa banwa it Kalibo, Banga, Numancia, Makato, Malinao, Lezo ag Ibajay.
Sa tribal big category, may inisyal nga premyo nga P120,000 pesos; P90,000 pesos para sa tribal small; P70,000 ppesos para sa modern tribal ag P60,000 pesos para sa balik-ati category.
Apang , ro magakampeon sa Tribal Big Category nga may waeong contingent hay magabaton it P1 milyon pesos.
Ginpahayag dugang ni Zabal nga ro inisyal approve nga premyo hay P350, 000 pesos apang gindugangan sigon ni Kalibo mayor Juris Sucro it P650,000 pesos rason nga umabot sa P1 milyon pesos.
Sa kabilugan suno kana hay nagaabot sa P6 milyon pesos ro nakataeana nga premyo sa nasambit nga contest ag kapin man sa P2.8 milyon pesos ro mga subsidiya it kada grupo ag tribu nga magapasakop sa dag-unan nga Ati-Atihan festival sadsad contest 2023.
