USA – Nagdeklara eun it state of calamity ro 6 nga estado it Amerika bangud sa naekeksperyansyahan nga grabeng winter storm.
Kaibahan kara ro mga estado it Kentucky, Virginia, West Virginia, Arkansas, ag pilang bahin it New Jersey, Kansas ag Missouri.
Sa Lexington, Kentucky, nailista ro 12.7cm (5 pulgada) nga niyebe kainang 5:30PM eastern time samtang sa siyudad it Louisville sa Kentucky, nailista man ro 19.5 cm o 7.7 pulgada it niyebe.
Sa may Topeka, Kansas, nailista ro 30 cm o 12 pulgada it niyebe, ikaap-at sa pinakamataas nga kabilugan nga snowfall nga nailista sa sueod eamang it sang adlaw.
Ro estado sigon it Kansas kaibahan eun ro Missouri ag pilang mga lugar hay ginasaligan nga eubos nga maapektuhan it winter storm kun siin kahapon, adlaw it Dominggo, magsobra 10 pulgada eun it niyebe ro tumugpa sa pilang lugar sa nasambit nga mga estado.
Bangud kara, una sa magsobra 60 million pumueoyo it Amerika sa magsobra 30 estado ro nakakaekperyensya it grabeng winter storm nga mahimo magdaea it pinakamabug-at nga snowfall ag pinakamaeamig nga temperatura sa magsobra sang dekada.
Una kara, una sa kabilugan nga 3,300 inbound ag outbound flights sa Amerika ro naantala samtang 1,700 man ro kinansela bangud sa winter storm.
Pinakaeubos nga apektado kara ro Kansas City International Airport ag St. Louis Lambert International Airport sa Missouri.
Samtang, sa pihak it mga epekto it winter storm, uwa napunggan ro ginahimo nga pagpahaom sa kabisera it Washington D.C. para sa sertipikasyon it resulta it 2024 presidential elections, sangka kinaandan nga procedures kada Enero 6 matapos ro eleksyon.
Sa idaeom abi it Electoral Count Reform Act, uwa it discretion ro US Congress nga bayluhan ro petsa para sa sertipikasyon ngani dapat umpisahan it Congress ro electoral votes dakong 1PM eastern time it Enero 6 o kung sa oras sa Pilipinas alas-2 it aga-aga adlaw it Lunes, Enero 6.
