KALIBO, Aklan—Matapos ro filing kahapon nga adlaw, ginpahayag it Kalibo municipal Comelec office nga ginatutukan nanda makaron ro pag-usisa ag beripikasyon sa mga gindihon nga Certificates of Candidacy ukon COC.
Suno kay Atty. Christian Itulid it Comelec Kalibo nga raya hay kaparte gihapon it andang pagpahaum sa maabot nga eleksyon sa Mayo 2025.
Naging masako sigon ro andang staff kahapon bangud sa mga kandidato nga last minute nga nagdihon it andang kandidatura.
Bandang alas-4:30 it hapon hay pormal nanda nga ginsarado ro pagbaton it mga maga-file it COC kun sa siin raya hay sandig sigon sa laye.
Ginpanglista eon lang sigon nanda ro pangaean it mga nakapila pa sa guwa it andang opisina.
Samtang, nag abot sa 22 ro kabilugan nga numero it mga nagpailihir sa banwa it Kalibo.
Kaibahan kara ro mga kilaeang pangaean ag mga beterano eon sa politika.
Sa nasambit nga numero, 2 ro nagsakar sa pagka-mayor, 4 sa pagka vice mayor, ag 16 sa pagka-sanggguniang bayan member.
Sa pihak nga parte, gindugang pa ni Atty. Itulid nga masadya imaw sa naging outcome it waeong adlaw nga filing para sa midterm elections bangud pangkabilugan raya nga naging maayos ag matawhay.
