Ginkumpirma it mga awtoridad nga indi maganaba sa 82 nga katawo ro nagkaeamatay matapos ro sangka gas explosion sa sangka coal mine sa Shanxi province sa China maeayo sa naunang report nga 90 nga katawo ro namatay.
Base sa report, natabu ro aksidente, gabi-i it Biyernes sa Liushenyu coal mine sa Changzhi city.
Sa pinaka-ulihing briefing it mga opisyal, ginkumpirma it mga raya nga 82 ro namatay, masobra sa 120 ro naospital, ag daywang iba pa ro padayun nga gina-usoy, kun sa siin, ginapatihan nga patay eon man.
Ginakabig it mga awtoridad nga “chaotic” ro sitwasyon matapos ro pagsabog, samtang padayun ro imbestigasyon sa rason it insidente.
Suno sa mga opisyal, may natukiban nga “serious violations” sa operasyon it minahan, apang owa pa ginpaguwa ro kpmpletong detalye angot sa mga pageabag.
Libu-libong rescuers ag medical personnel man ro insigida nga ginpadaea sa lugar agud nga magbulig sa search and rescue operations.
Maabu sa mga naninahan hay naapektuhan it makahieilo nga gas.
Mag-eowas kara, ginmanduan eon ni Chinese President Xi Jinping ro insigidang pag-rescue sa mga missing ag nagpanawagan man it maid-id nga imbestigasyon agud nga mapasabat ro mga eakot sa pinaka-grabeng mining disasters sa China sa nagtaliwan nga masobra sa 15 anyos.
Samtang, nagtuhaw man sa mga report nga may mga pageabag sa safety protocols ro cole mine, kaibahan ro gina alegar nga owa pagsunod sa mandatory tracking devices para sa mga trabahador ag owa nagakasinanto nga mining blueprints nga gintau sa mga awtoridad.
Ginpaathag man it state media nga ro numero it mga una sa sueod it minahan ko tiempo it pagsabog hay posibleng doble sa nakabutang sa opisyal nga record it kumpanya, nga nagpa-grabe sa sitwasyon it rescue operations.
