KALIBO, Aklan—Kabilugan nga 85 nga mga backyard hog raisers nga naapektuhan it African swine fever ukon ASF sa bilog nga probinsiya it Aklan ro naaprubahan ro andang insurance claims ag posibleng magabaton it kabilugan nga P1,081,700 pesos nga balor it financial assistance halin sa Philippine Crop Insurance Corporation ukon PCIC.
Suno kay Catherine May Sollano, head it PCIC-Aklan nga ro nasambit nga mga beneficiaries nga maka-avail it insurance program hay natigayon nga makasumite it mga requirements.
Sa makaron hay kapin sa 900 nga iba pang hog raisers ro andang ginaproseso ro requirements ag engkaso nga maaprubahan hay makabaton it indemnification nga kapin sa P30 million pesos.
Sa Aklan, may kabilugan nga 1,017 hog raisers ro covered it PCIC ag 991 ro posibleng apektado it ASF.
Engkaso suno kay Sollano nga makabaton ro sangka hog raiser it denial letter hay pwede sandang makasumite it uman it andang reconsideration letter sa sueod it 30 diyas.
Sa oras nga naapektuhan it ASF, kinahangean nga mag agto eagi sa natungdan nga Municipal Agricultural Office, kun sa siin ro mga gina-proseso it PCIC hay ro mga may existing policy ukon owa pa na-expired ro andang swine insurance.
Ro bayad sigon sa breeder hay kapin sa P14,500 pesos samtang sa fattener hay P10,000 pesos per head depende sa edad it baboy.
Dugang pa ni Sollano nga dapat nga kalitan it mga hog raisers ro pagpa-insured sa andang mga kasapatan agud nga engkaso nga anuman ro matabu hay mabayaran sanda.
Apang sa makaron hay temporaryong sarado ro andang application sa swine insurance.
Base sa datos it Office of the Provincial Veterinarian, 14 eon nga banwa sa Aklan ro apektado it makataeapon ag makamaeatay nga viral disease nga naka apekto sa mga alagang baboy sa probinsiya.
Bangud kara, gindeklara man it sangguniang panlalawigan ro probinsiya nga ipaidaeum sa state of calamity sa ginpatigayon nga regular session.
