OLYMPIC Update— Haum eon ro sambilog sa Pinoy athlete nga si Nesthy Petecio nga makasambuwa ro world’s number 1 nag si Ling Yu Ting halin sa Chinese Taipei para sa Women’s Featherweight Category makaron nga adlaw it Lunes.
Raya hay matapos nana nga pyerdihon ko adlaw it Sabado si Marcelat Sakobi Matshu it Democratic Republic of the Congo sa pamaagi it unanimous decision ukon 5-0 nga score halin sa judges.
Ginasugid nga nagserbing “warm-up” para kay Petecio ro naging face off nanda ni Matshu.
Ginpahayag ni Nolito Velasco, head coach it Philippine Women’s Boxing team nga kinahang-ean man nga magdaog si Petecio sa hampang kay Lin agud nga makasueod sa quarter finals ag magarantiya ro maskin bronze medal para sa Pilipinas.
Ginapasaeamatan man sigon ni Petecio ro ginapakita nga suporta it mga Pilipino.
Sa pihak nga parte, pag-abot sa medal tally nagapanguna sa gihapon ro China matapos nga makabuoe it 11 nga medalya nga ginakaeakipan it an-om nga bueawan, sambilog nga silver ag ap-at nga Bronze.
Ginasegundahan man raya it host country nga Japan nga may limang bueawan ag sambilog nga silver medal.
Pangatlo ro USA nga may ap-at nga gold, daywang silver ag ap-at nga bronze medal.
South Korea nga may daywang gold ag sambilog nga bronze.
Samtang ro Pilipinas hay owa pa nakabuoe it maskin sambilog nga medalya hasta sa makaron.
