KALIBO, Aklan—Viral makarun ag pinusuan it mga netizen sa social media ro sangka security guard nga na-assign sa sangka pawnshop sa banwa it New Washington matapos nga abutan it kwarta ro estudyanteng owa it pambakae it pagkaon.
Suno sa 4th year Criminology student nga si John Boy Saldivia naghingyo sigon imaw sa anang barkada nga padaehan it 500 pesos nga kwarta agud nga may maibakae it pagkaon matapos nga maubusan it maskin piso sa anang buesa.
Bandang 4:30 ro pang orason it hapon kat nagbaktas imaw paadto sa nasambitan nga pawnshop agud nga i-claim kungta ro kwarta apang ro naabutan eamang nana hay ro security guard nga si Mariel Bolivar nga sa rato nga pang-orason hay nagapanilhig eun ag nagapahaom sa pagsarado.
Bangud kara hay naghinyo sigon imaw kung puwedi pa nga mabo-oe ro ginpadaea nga kwarta kana bangud owa eun sigon imaw it makaon sa ihapon.
Medyo napa-isip pa sigon si manong guard kung ano anang himuon hasta nga ko ulihi hay nagbo-oe raya it kapin sa 100 pesos ag gilayon nga gintao kana.
Bilang pagpasaeamat hay nagpost imaw sa facebook ag matapos ro pilang oras hay ginbaha raya it komento bukon eamang it maghalin sa mga Akeanon kungdi nag-eapta eun sa bilog nga nasyon.
Samtang maabo man ro nag-react kung sa siin maging sanda hay nasaksihan man sigon ro pagiging maaboot ag maabi-abihon nga personalidad ni Bolivar.
Matapos nga nagviral ro nasambitan nga fb post hay nakabatun man si Bolivar it pagkilaea ag bulig pinansiyal maghalin sa kampaniyang anang ginatrabahuhan.
