KALIBO, Aklan—Ginmandu it Land Transportation Office ukon LTO-Aklan sa sektor it transportasyon nga ibalik eon sa dati ro pamasahe sa mga public utility vehicle.
Raya ro ginpahayag ni LTO-aklan head Engr. Marlon Velez kasunod it inspeksyon it anang gin deploy nga mga enforcers sa mga terminal sa eastern ag western side it probinsiya.
Suno kana nga nagpatawag man imaw it pueong sa presidente it mga nagkaeain-eain nga asosasyon agud nga ipaabot ro anang mandu.
Nataeupangdan sigon it anang mga enforcers nga maskin nga owa eon it plastic barrier sa mga jeep hay nagapabilin nga mataas ro pamasahe kun sa siin ro iba partikular sa eastern side hay 100 hasta 150% ro ginsaka.
Kasunod raya it pagdugang it passenger capacity nga halin sa 50% hay 70% eon makaron.
Naobserbahan pa nga haeos 100% eon ro sakay nga pasahero it pilang mga jeep.
Nauna eon nga nagreklamo ro mga commuters ag naghinyu nga ibalik eon sa dati ro pamasahe bangud sa nasambit nga kalakaran.
Samtang, gindugang pa ni Engr. Velez nga umpisa hin-aga, sabado nga adlaw hay maga umpisa sanda it pag-monitor sa panueuktan it pamasahe ag ro sin-o man nga maga-eabag hay pagatiketan nanda it overcharging.
