KALIBO, Aklan—Bukas ro ap-at ka mga presidential candidates nga ipadayun ro peace talk sa tunga it gobyerno ag NDF-CPP-NPA.
Ginakaeakipan raya nanday labor leader Leody De Guzman, dating defense secretary Norberto Gonzales, dating senador Ferdinand “Bongbong” Marcos Jr. ag dating presidential spokesman Ernesto Abella.
Sa andang pag-atubang sa presidential debates it SMNI sa Okada Manila kahapon, ginpunto ni De Guzman nga nag-ugat ro armadong pakikibaka sa pagpang-api sa mga pumueoyo ag ro kapas-eawan nga ipatuman it maayos ro land reform.
Pumabor man si Gonzales kay De Guzman ag gintumod ro kawad-an it partikular nga laye para sa rebelyon rason nga nagahueag eamang ro gobyerno base sa criminal law.
Haum man sanday Marcos ag Abella nga ipabilin ro National Task Force to End Local Communist Armed Conflict engkaso nga magdaog sa pagkapangueo.
Igasueong man it dating senador ro pagpadayun it ‘balik loob’ program bilang kaparte it peace talk samtang gusto ni Abella nga i-eakip ro economic development sa mga solusyon agud nga matuldukan ro armadong pakikibaka.
