KALIBO, Aklan—Target it lokal nga gobyerno it Banga nga mabakunahan man kontra sa COVID-19 ro 390 nga mga unga nga 5 hasta 11 anyos.
Suno kay Ms. Donnalyn Siyambio, head nurse it Rural Health Unit ag tagapaghambae it Banga Inter-Agency Task Force nga sa Lunes nga adlaw, Pebrero 21 hay paga-umpisahan nanda ro pagturok it Pfizer COVID-19 vaccine nga formulated para sa mga edad 5 hasta 11 anyos sa andang vaccination site sa Teodosio’s park.
Apang nakadepende sa supply it bakuna nga igatau kanda it provincial health office kon maga-dere-deretso ro andang vaccination roll-out sa nasambit nga age group.
Kada barangay sigon ro andang schedule nga personal nga gina-agtunanan it mga tawuhan it barangay partikular it andang BHW ag ginpa-rehistro it andang midwife ro mga gustong magpabakuna.
Sa pihak nga parte, nag-abot eon sa 82% it andang target population sa banga ro fully vaccinated ag nagapadayun pa ro andang bakunahan sa adult ag mga naga-edad it 12 hasta 17 anyos.
May mga walk-in sigon nga nagahingagaw nga magpa-vaccine it 1st dose samtang ro iba hay para sa booster shots.
Sa pihak nga parte, gindugang pa ni siyambio nga zero case eon sanda sa COVID 19 sa nasambit nga banwa matapos nga magmayad eon ro tanan nanda nga mga residente nga tinamaan it deadly virus.
