KALIBO, Aklan—Gin-engganyo ni Atty. Romulo Macalintal ro Commission on Elections nga temporaryong suspendihon ro implementasyon it regulation para sa oversized nga campaign posters nga ginapaskil sa mga private property.
Sa anang sueat sa Comelec, ginhinyu ni Macalintal ro temporary suspension it nasambit nga direktiba hasta Marso 25, nga pag-umpisa it campaign period para sa local candidates.
Raya sigon hay para mataw-an it bastante nga tyempo ro Comelec nga ma-review ro andang mga regulasyon.
Ginkwestiyon ni Macalintal ro pagbuoe it ginasugid nga mga “illegal” campaign posters sa private property nga owa it notice ukon hearing, sa pagpahayag nga raya hay pag-eabag sa constitutional rights it sangka tawo ag maging sa due process.
Gin-insister pa kara nga bukon it sakop sa mga probisyon it Republic Act 9006 ukon Fair Election Act angot sa election propaganda materials ro mga private persons ukon mga non-candidates bangud para eamang raya sa mga kandidato ag mga political parties.
Para kay Macalintal, may una nga kinamatarong ro sangka private person nga maipahayag ro anang mga ideya sa pamaagi it pagkabit it mga campaign materials, maskin pa ro para sa mga kandidato, sa sueod it andang mga private properties.
