KALIBO, Aklan—Ginpukaw it grupo it Bayan Panay ro igtueopangod it gobyerno angot sa kakueangan it aksyon sa padayun nga pagtinaas it presyo it produktong petrolyo sa nasyon.
Suno kay Bryan Bosque, Regional Chairperson it Bayan Panay nga napueong beses eon nga nagpataas sa kada litro it petrolyo ro nagkaeain-eain nga oil companies kung siin batyag eon ro domino effect kara sa mga nagapangunang baeak-eon tuga it transportation cost.
Ginakabaeak-an man kara ro ginaeauman nga bigtime oil price increase sa maabot nga adlaw it Martes kung siin magahampang sa P4.50 ro pagtaas sa kada litro it gasolina ag P3.50 sa kada litro it diesel.
Bangud kara, eubus sigon nga ginakinahang-ean ro insigida nga pag-aksyon it gobyerno agud nga indi eon madugangan pa ro gina-antus it mga pumueoyo.
Nasayuran nga naga-abot eon sa P11 ro gintaas it diesel, haeos napueong piso sa gasolina ag masobra sa napueong piso sa kerosene.
