KALIBO, Aklan—Eubus ro kalipay makaron it mga vendors mas kapin pa ro mga bolantero matapos nga nagbalik eon ro market day sa Kalibo public market.
Raya hay kasunod sa pagpaidaeom sa probinsya it Aklan sa alert level 1 kon siin haeos una eon sa new normal ro bilog nga probinsya.
Suno sa vendor nga si Virginia David it Brgy. Polocate, Banga, eubus gid nanda nga ginapasaeamatan makaron ro andang pagbalik sa tindahan bangud nga kon madumduman sa kasagsagan it pandemya hay nagpundo man sanda sa pagnegosyo samtang ro iba hay nagalibot sa ibang banwa sa adlaw it tyenda.
Sa makaron sigon hay uwa pa sanda it pagpataas sa presyo it andang mga baligya bangud nga nagapabilin pang normal ro presyuhanay kara maghalin man sa andang mga supplier.
Haeos kaeabanan sa mga tinuean-on hay kaugalingong produkto it mga vendors rason nga nagapabilin man raya sa dating presyo.
