Ginproponer ni Labor Secretary Silvestre Bello III ro pagtao it P5-K wage subsidy sa kapin sa 1 million minimum wage earner sa small enterprises.
Suno kay Bello, ginsumite eon nana ro proposal kay Pangueong Rodrigo Duterte apang owa pa raya na-aprubahan.
Ginkumpirma man ni Director Rolly Francia it Information and Publication Service it DOLE nga ro proposal hay para sa mga empleyado nga pinaka-naapektuhan it COVID-19 pandemic ag pagtaas it inflation rate daea it Oil price hike ag basic services.
Sa idaeom it proposisyon, igatao ro P5,000 sa mga empleyado nga una sa Interim period samtang ginatalakay eon man ro hirit nga minimum wage hike it nagkaeain-eain nga regional wage boards.
Magaplastar pa sigon it mechanics apang puro mga kumpanya ro maga-sumite it application samtang magiging first-come, first-served basis ro approval kapareho sa COVID-19 Adjustment Measure Program (CAMP).
