Balik-trabaho eon matapos ro pilang adlaw nga pagdumdum sa Semana Santa.
Kadungan kara, balik-kalbaryo eon man sa problema sa mataas nga presyo partikular sa petrolyo.
Nauna eon nga nagpatuman ro pilang kompaniya it langis it pagtaas sa presyo it andang mga produkto kahapon nga adlaw it Martes.
Raya hay kasunod it daywang domingo nga magkasunod nga rollback sa presyo it krudo, gasolina ag kerosene.
Haeos P1.70 ro pagtaas sa kada litro it diesel, 45 sentimos man sa kada litro it gasolina samtang 45 sentimos man sa kerosene.
Ro rason sigon it price adjustment hay ro mas mahae nga presyo it gin-import nga petrolyo ko Huwebes Santo.
Raya hay nagakahueugan nga kinahangean sa gihapon nga mag-obra it pamaagi agud nga makatipid bangud nga paeariho man kita nga owa it mahimo.
Maskin nga may ayuda halin sa gobyerno, apang bukon man it tanan hay nataw-an sa pihak nga tanan kita hay apektado.
Makasueubo eamang bangud nga samtang nga nagasakit ro ueo it publiko sa owa it pundo nga pagtaas sa presyo it mga baeak-eon ag sukot sa serbisyo, masako man ro mga kandidato sa mga gimik, pagbaeanatan ag kon anu-ano pang drama.
Ro ginaeauman it publiko hay makaangkon it mga konkretong solusyon sa raya nga mga problema engkaso nga sanda eon ro magapungko sa pwesto.
Sa makarondaya nga sitwasyon kunta sanda magpa-bonggahan it plataporma agud nga may ideya eon ro mga botante kun sin-o ro may ‘K’ nga magdaog.
