Gin-aku it kontrobersiyal ag self-confessed drug lord nga si Kerwin Espinosa nga bangud sa grabeng pressure ag paeag sa anang kabuhi maskin sa anang pamilya rason nga nahimo nana nga magdaeahig it ibang tawo nga owa it saea.
Sambilog eon kara si Sen. Leila De Lima nga anang gin-akusahan nga eakot sa illegal drug trade sa sueod mismo it New Bilibid Prison (NBP).
Apang, sa sangka counter affidavit nga anang ginsumite sa Department of Justice (DOJ) sa pamaagi it anang abogado nga si Atty Reymund Palad, ginbawi ni Kerwin ro tanan nga anang akusasyon kontra kay Sen. De Lima.
Sa pakikipag-angot it Bombo Radyo kay Atty. Reymund Palad, ginpaathag kara kung ham-an ginbawi ni Kerwin ro anang mga pahayag kontra sa mamalidha.
Ginpahayag ni Atty Palad, owa eon na-appreciate it anang kliyente ro pagiging state witness bangud nga owa man imaw ginagamit bilang testigo ag owa nasunod ro na-istoryahan nga magiging state witness si kerwin ag ro kabaylo kara hay bawion ro mga ginpasaka nga kaso kontra kana.
Dugang pa ni Atty. Palad, ro affidavit ni Kerwin hay resulta sa sangka bag-ong kaso nga ginpasaka it National Bureau of Investigation (NBI) sa DOJ nga nabaton it andang kampo ko Marso 2022.
Suno kana, bangud nga may bag-ong kaso kinahang-ean nga magsumite it counter affidavit ro anang kliyente ag kahapon hay ginsumute eon nanda raya sa DOJ.
Si kerwin hay nagapangatubang sa patung-patong nga kaso.
