Pilang mga establisimento partikular sa metro manila ro ginpadaehan it show cause order it Department of Trade and Industry (DTI) bangud sa gina-alegar nga owa pagbutang it “price tag” sa pila sa andang produkto.
Raya hay matapos ro ginpatigayon nga price and supply monitoring sa Basic Necessities and Prime Commodities it Department of Trade and Industry-Consumer Protection Group sa pilang mga supermarket.
Ginpaathag it taeatapan, gintaw-an it show cause order ro nasambit nga mga baealigyaan bangud sa kawad-an it “price tag” it pila sa andang produkto
Bagay nga kabaliskaran sa Republic Act 7394 ukon Consumer Act of the Philippines.
Sa idaeum it laye , ginabawae ro pagbaligya ag pagtanyag sa mga bumaeakae it anuman nga produkto nga owa it maayos nga price tag ukon label, ukon mas mataas ro presyo kumpara sa mga tag.
Sa kamatuoran eamang, mabuhay eon raya nga nagakatabu ag indi eon pwedeng balewalaon.
Rason nga ginahinyu sa mga natungdan nga huguran pa ro paglibot sa mga baealigyaan agud nga masayuran kon tanan baea nga mga negosyante hay nagasunod sa laye.
Bangud nga kon may sambilog nga maga-eabag, posibleng pagatuearon raya it iba ag ro ending, maabu ro maga abuso ag makaeoeo-oy ro mga bumaeakae.
Maabu kanda ro nagatinguha nga paigu-on ro budget para sa pang adlaw adlaw nga kinahangeanon rason nga nagabase eamang sa price tag ro mga ginabakae.
Ag kon owa kara hay apektado ro mga pag budget.
Tinguhaan nga ginasunod ro laye ag magapanabat ro sin-o man nga maga-eabag.
Pamatud-an naton nga seryoso kita sa laye para sa kamaeayran it mga consumer.
