Ginatugis makaron ro sangka babayeng guwardiya ag ro eaeaking preso nga anang ginpaeagiw halin sa sangka presuhan sa Alabama, USA.
Ro daywa hay nasayuran nga may romantikong relasyon.
Ginkilaea ro mga gina-usoy nga sanday Vicky White, 56-anyos, sangka Corrections Assistant Director; ag ro murder suspect nga si Casey White, 38-anyos , nga ginakabig nga “extremely dangerous.”
Sa sangka security footage, makita ro kalmadong pagpaeagiw nanday Vicky ag Casey halin sa detention center ko Abril 29.
Owa nahalata it ibang guwardiya nga ginapaeagiw eon gali it babayeng jail guard ro suspek.
Ginhambae sigon ni Vicky sa mga katrabaho nga nakataeanang magpaidaeum si Casey sa sangka mental health evaluation sa korte.
Makita pa nga nakaposas ro eaeaki kat magguwa ro daywa sa detention center.
Nakita man sa CCTV sa sangka gasolinahan ro pag-agi it gingamit nanda nga patrol car apang bukon it sa korte sanda nag deretso.
Ko ulihi, gin-aywan it daywa ro patrol car sa parking lot it sangka shopping center.
Nakabaton man it tip ro mga awtoridad nga nagbaylo it saeakyan ro daywa.
Unang gin-eaum it mga imbestigador nga “under duress” ukon ginpaeag it preso ro guwardiya rason nga nahimo kara ro krimen.
Apang nadiskubre it mga awtoridad halin sa ibang inmates nga may una nga “special relationship” sanday Vicky ag Casey.
May padya nga $5,000 hasta $10,000 dollars ukon masobra sa P500,000 pesos ro US Marshals Service sa sin-o man nga makaturo sa ginakahimtangan it daywa.
