Nag-abot eon sa 4.9 percent ro inflation it Pilipinas ko Abril 2022, suno sa Philipline Statistics Authority (PSA).
Ro inflation hay ro pagtaas it presyo it mga ordinaryong baeak-eon ag serbisyo.
Bilang sabat, doble-kayod eon sigon ro Palasyo agud nga masabat ro inflation it nasyon pinaagi sa pagtutok it atong economic team.
Ro padayun nga pagtaas it presyo it mga baeak-eon hay makabig nga kaparte it ginatawag nga ‘domino effect’ nga nag-umpisa sa pagtaas it presyo it petrolyo nga halin man sa nagkaeain-eain nga rason kapareho it nagakatabu nga giyera sa ibang nasyon ag ro presenteng pandemya bangud man sa COVID-19.
Rason nga mabahoe nga bagay nga ro atong mga representante sa gobyerno hay may nasayuran sa pag-atubang sa mga makarondaya nga problema.
Paalin nanda nga pagadunganan ro mga sitwasyon nga indi makontrol eabi eon it mga nasyon nga bukon man it kapareho ka manggaranon it iba.
Paalin nanda nga mataw-an it alternatibong pamaagi nga maka-survive ro pumueuyu.
Paalin nanda nga masiguro sa publiko nga masarangan naton nga maeampasan ro kada adlaw nga indi eubusan nga maduea-an it pangabuhian.
Makaron ro tama nga tiempo agud nga mas pang pag-isipan it mga Pinoy partikular it mga botante kun sin-o baea ro mga mas nagakabagay sa gobyerno.
Indi dapat nga basehan ro mga matam-is nga tinaga ukon abot-eangit nga mga promisa.
May pilang adlaw pa agud nga pag-isipan ro atong mga pagapili-on sa balota.
Sanda dapat ro atong mga kabulig sa pagbangon halin sa kapigaduhon ag kadungan naton nga maga-atubang sa mga owa ginaeauman nga problema.
