Sangka pasahero sa Florida ro eowas nga nakapagpa-landing it 9-seater nga eroplano maskin nga owa imaw it experiensiya sa pagiging piloto matapos makaangkon it medical emergency ro kaibahan nga pilot.
Suno kay Florida airport Air Controller Robert Morgan, breaktime nana kat makabaton imaw it tawag halin kay Darren Harrison nga nagahambae nga naduea-an it alintro ro anang kaibahan nga piloto.
Suno kay Harrison owa pa imaw nakakapaeupad it eroplano apang bangud nga pirme imaw nga nagasakay sa mga private jet, pirme nana nga nakikita ro mga piloto kun paalin raya nga paeuparon.
Ro unang desisyon nga gin-obra ni Morgan hay giyahan si Harrison nga paeuparon ro eroplano sa direksyon paagto sa pinakamabahoe nga airport sa Florida.
Sa nasambit nga airport hay mabahoe ro mga runway para maging madali sa sangka bag-uhan nga i-landing ro eroplano.
Masunod kara hay step-by-step nga nagtau it instruction si Morgan kay Harrison kun ano ro mga pagapinduton sa control it cockpit.
Eowas nga hapa-landing ni Harrison ro eroplano ag maabung piloto sa nasambit nga airport ro nagdayaw bangud nga nagakinahangean it 20 oras antes nga matun-an it sangka student pilot nga magpa-hugpa it eroplano.
