Maabu eon ro naga-abang nga magapungko bilang pangueo si Ferdinand ‘Bongbong’ Marcos, Jr.
Gina-abangan man ro anang promisa nga paga-obrahon nga 20 pesos ro kada kilo it bugas.
Sa pihak kara, suno sa Department of Trade and Industry (DTI), maskin nga posible, kinahangean gihapon ro maid-id nga tun-an ro nasambit nga proposisyon.
Sa makaron, ro local commercial rice price sa Metro Manila hay nagahampang eon halin sa P38 pesos hasta P50 pesos kada kilo samtang ro imported commercial price it bugas hay halin P37 pesos hasta P52 pesos kada kilo depende sa klase it bugas.
Mataeupangdan nga masyadong maeayo sa gina-abangan nga P20 pesos ag maga-agi anay sa pag-istorya ag pag estudyo bangud nga siguradong may magareklamo.
Samtang, sambilog sigon sa pwedeng obrahon hay igabalik ro NFA rice sa baealigyaan.
Raya hay mas barato apang indi mabakae it tanan kundi it mga pinaka-pigado eamang nga pamilya.
Bukon it simple eamang ro pagbag-o sa presyo it mga baeak-eon.
Kinahangean nga tun-an it mayad agud nga indi mabutang sa aeang-aeang ro ibang isyu nga may kaangtanan kara.
Rason nga dapat nga mga maaeam ag may ikasarang ro mga gabinete it masunod nga administrasyon nga maga-atubang sa mga makarondaya nga isyu.
Kita hay sa tunga pa gihapon it pandemya ag krisis.
Owa it maeain kon maghinay-hinay sa mga desisyon agud nga indi mas pang mag-grabe ro sitwasyon.
