Ginpaabot sa publiko ni Infectious Diseases Expert Dr. Edsel Salvaña nga may una nga access ro nasyon agud nga makabo-oe it bakuna kontra sa monkeypox, engkaso nga raya hay kinahangeanon.
Suno kay Salvaña, maskin nga owa pa it stockpiles it mga bakuna, may una eon kita nga contacts sa united states centers for Disease Control (CDC) ag iba pang mga ahensya kun kinahangeanon ro pag-procure kara.
Ginasugid nga pito hasta katorse diyas sigon ro incubation period it monkeypox rason nga may una pang oras para sa contact tracing kamana man ro pagtau it bakuna.
Samtang, ginpasiguro pa it eksperto nga ro monkeypox hay bukon it makataeapon kapareho it COVID-19.
Sa pihak nga parte, nakalista eon it unang kaso it Monkeypox virus ro United Arab Emirates (UAE) nga kauna-unahang nakaangkon it nasambit nga sakit sa Arab States of the Persian Gulf.
Kaibahan pa sa mga nasyong nakalista it kaso it Monkeypox virus hay ro Australia; Austria; Belgium; Czech Republic; Denmark; Finland; France; Germany; Italy; Netherlands; Portugal; Slovenia; Madrid, Spain; Sweden; Switzerland; England, United Kingdom; Israel; Argentina; Quebec Province, Canada; ag United States.
Ginaeauman nga mas pang magataas ro numero it kaso sa bilog nga kalibutan.
