KALIBO, Aklan–Naging viral sa social media ro ginpatigayon nga “charity ride” it Moto Klasik Philippines-Aklan chaper nga ginpasakupan it maabu nga mga riders sa probinsiya.
Suno kay David Justin Maraña, Post Admin it MotoKlasik Philippines Aklan chapter nga ro event hay ginatawag nga “Distinguished Gentleman’s Ride” sangka global event nga nag-umpisa ko 2012 kaibahan ro 120,000 riders halin sa 650 nga siyudad sa bilog nga kalibutan.
Raya hay gintukod sa Sydney, Australia ni Mark Hawwa kun sa siin ginasugid nga na-inspire raya sa litrato ni Don Draper it Mad Men samtang nakasakay sa anang classic nga motorbike ag nakasuksok it suit ukon amerikana.
Raya suno kana ro rason kon ham-an nga nakasuksok man sanda it dapper retro-inspired attires ag vintage suits agud nga mai-pares sa andang classic nga mga motorbikes.
Tuyo kara nga makatipon it pondo ag makaangkon it awareness para sa ikamayad nga eawas it mga kaeaeakin-an partikular ro prostate cancer ag mental health.
Raya sigon ro ikaywang beses nga ginpatigayon ro event apang makaron nga dag-on opisyal raya nga ginkilaea it main organizer.
Kapin sa 40 nga aklanon sigon ro nagparehistro ag may iba pang mga riders nga naghalin sa antique ag Iloilo nga naglibot sa nagkaeain-eain nga banwa sa aklan ukon minimum nga 40 kilometers nga rota nga igabiyahe.
Kadungan kara, gin-imbitahan ni Joseph Recacho, presidente it motoklasik Philippines aklan chapter ro iba pang riders nga mag-join sa andang grupo.
Kada Biyernes sigon nga adlaw hay nagatipon-tipon sanda sa ati-atihan avenue.
