Batyag eon makaron pa eamang ro sambilog pang eleksyon.
Raya hay ro nagahilapit nga Barangay ag Sangguniang Kabataan (SK) Elections.
Maskin nga sa Disyembre pa raya, mataeupangdan nga nagapabatyag eon ro mga nagahandum nga magkandidato.
Ginaeauman nga magiging mas mainit, makolor ag masangag ro pambarangay nga eleksyon kaysa sa nagtaliwan nga nasyunal.
Social media gihapon ro magaserbing ‘battle ground’ it mga supporters.
Makasueubo bangud nga haeos bag-o eamang kita nga nakapahuway halin sa pagbasa ag pagtan-aw it mga ‘word war’ ag may paeaabuton eon man.
Owa kita it mahimo bangud nga kaparte raya it hilway nga pagpangampanya.
Sa pihak kara, ro gusto naton nga mabasa ukon mabatian hay ro mga mapuslanon nga nahimo it mga presenteng opisyal nga gustong magpadaeagan it uman ukon ro mga manami nga plano it mga bag-ong magasabak.
Eabaw sa tanan, ro mga barangay officials ro nakasayod it matuod nga sitwasyon it pumueuyu eabi eon it mga pigado.
Rason nga nagaeaum kita nga mga nagakabagay ro magapabilin ag mabutang sa pwesto.
