KALIBO, Aklan–Gina-abangan eon it mga pumueoyo sa San Francisco, California ro Game 2 it best of seven championship series it NBA Finals sa tunga it Boston Celtics ag Golden State Warriors.
Suno kay Bombo International Correspondent Greg Aguilar nga medyo nakaapekto sa panan-awan it mga fans ro pagdaog it Celtics sa Game 1.
Aminado si Aguilar nga haeos nakibot ro tanan sa ginpakita nga kamayad it Celtics eabi eon kat nagpauean ro andang mga star player it 3 point shot.
Dapat sigon nga pabaskugon it Warriors ro andang depensa para mabuoe ro kadaeag-an sa Game 2.
Engkaso sigon nga magdaog ro Celtics sa Game 2 hay mabahoe ro posibilidad nga mabuoe nanda ro kampeonato makaron nga season.
Raya hay bangud nga mas magiging paborable eon kanda ro pagahiwaton nga Game 3 ag 4 bangud idtu raya nakataeana sa andang hometown partikular sa estado it Massachusetts.
