Nagakalhit makaron ro balita sa bilog nga Paraguay ro angot kay “Gordito Lindo”, sangka presu nga nakapaeagiw sa presuhan bangud sa pagpakuno-kuno bilang sangka babaye.
Ko Mayo 29, owa it kabudlay ag hilway nga nakaguwa sa front gate it Tacumbu National Penitentiary si Cesar Ortiz.
Kaeakip it anang kahilwayan , nakaangkon imaw it bag-ong alyas bilang “Gordito Lindo nga ro buot hambaeon hay gwapang chubby.
Ro anang bag-ong alyas hay naghalin sa anang pamaagi kon paalin imaw nga nakapaeagiw sa presuhan.
Samtang sa conjugal visit si Ortiz, nagsueod imaw sa sangka private room kaibahan ro sangka kakunchaba nga babaye.
Nakipagbaylo imaw it eambong sa babaye ag nagsuksok it mahabang wig, false eyelashes, lipstick, fake fingernails ag facemask.
Sa bulig it mga disguise kara, ginpaguwa imaw it mga jail guards sa pilang checkpoints hasta nga makapaeagiw imaw sa main door it penitentiary.
Maskin nga madasig nga nakahilway si Ortiz, madasig man nga na-trace it mga awtoridad ro anang ginapanaguan nga lugar ag sa sueod it daywang oras, naaresto eagi imaw it mga pulis.
Bangud kara, nasuspinde ro security officers nga naka-duty kat matabu ro pagpaeagiw.
Ginsaylo si Ortiz it ibang penitentiary ag siguradong madugangan ro anang naunang sentensiya nga tatlong dag-on ag siyam nga buean para sa kasong aggravated assault and robbery.
