Nagpanawagan si Bataan 1st District Representative Geraldine Roman nga ipasa eon ro SOGIE bill nga tuyo nga mataw-an it kinamatarong ro mga miyembro it LGBTQIA+ community kontra sa diskriminasyon.
Ginkondena ni Roman ro naging pagtrato sa blogger/journalist nga si Sass Sasot sa sangka graduation ceremony nga ginhiwat sa simbahan it sangka religious group sa Dasmariñas, Cavite ko Hunyo 3.
Madumduman nga gin-imbitahan si Sasot bilang guest speaker sa aktibidad it mga Senior High School students it Southern Philippines Institute of Science and Technology kung siin, ginpatyan imaw it iwag ag sound system sa katung-anan it diskurso.
Nagpangayo man it pagpasaylo ro pamunuan it eskwelahan sa pagpanguna it presidente ag CEO nga si Dr. Erlinda Manzanero maging ro pamunuan it Church of God-Dasmariñas sa pamaagi ni Senior Pastor Bishop Anthony V. Velasco.
Sa social media post ni Sasot, ginpahayag kara nga owa imaw it plano nga magpasaka it kaso ag gin-engganyo ro pamunuan it eskwelahan nga nag-imbita kana nga i-donate eon lang sa Church of God-Dasmariñas ro honorarium ukon bayad sa anang speakership.
Samtang, ginpasaeamatan man ni Roman si Cavite Governor Jonvic Remulla sa pagkondena kara sa insidente.
