Gindeklara ni President-elect Ferdinand Marcos Jr. sa anang Statement of Contributions and Expenditures (SOCE) nga naga-abot sa masobra P623 million ro haega it nagastos sa anang kampaniya ko nagtaliwan nga May 2022 elections.
Ginsumite it legal counsel ni Marcos Jr. ro anang SOCE sa Commission on Elections (Comelec) nga nagapahayag nga naga-abot sa P623,230,176.68 ro anang total expenditures sa election.
Nauna eon nga nagdeklara ro partido Federal ng Pilipinas ni Marcos nga kapin sa P272 million ro andang nagastos para sa eleksyon kung siin mabahoe nga haega kara ro gintaeana sa television advertisements ag mga campaign rallies.
Samtang, sa datos it Comelec as of June 6, daywang presidential candidates pa eang ro nakadihon it andang SOCE, ap-at para sa senatorial, 3 political parties ag 34 arty-list groups.
Suno kay acting poll spokesperson John Rex Laudiangco owa pa naistoryahan it Comelec kung pagapaeawigon pa ro nakataeanang deadline it pagdihon it SOCE nga nakataeanang magpaso makaron nga adlaw, Hunyo 8.
Sa oras nga mapas-eawan nga makadihon it SOCE ro mga nagdaog nga kandidato pagabawaean ro mga raya nga magpungko sa andang pwesto samtang ro mga naperdi nga owa nakadihon it SOCE hay pagakasuhan it adminsitrative charges ag penalties halin P1000 hasta P30,000 kaeakip ro disqualification sa pagdaeagan sa anumang posisyon sa gobyerno.
