Malabo ag owa pa it kasiguraduhan kon hin-uno matapos ro sunud-sunod nga pagtaas sa presyo it petrolyo.
Rason nga grabe ro pagreklamo it mga una sa transport group.
Halin sa mga tricycle, jeepney, taxi, FX ag bus driver ag operators, nagakanya-kanya eon lang it diskarte.
Maabu kanda ro nagpundo sa pagbiyahe.
Ginarason nanda nga ham-an nga magabiyahe pa kon ro kita hay naagto eamang sa pagpa-karga it diesel ukon gasolina.
Maabu eon makaron ro owa nagabiyahe ag maabu man nga motorista ro owa nagadaea it andang pribadong saeakyan ag nagdesisyon nga mag commute eon lang.
Gina-insister it transport group, pasugtan eon nga mapataas ro pamasahe maskin nga temporaryo eamang agud nga makasabat ro andang ginakita sa andang kinahangeanon.
Ro taxi operators, P20 pesos ro ginaduso nga ipasaka sa andang flag down rate, ro mga jeepney mabahoe nga bulig sigon kon mapasaka sa P5 pesos ro pamasahe.
May hirit man nga pataasan ro pamasahe it mga tricycle drivers.
Naghinyu ro transport group sa mga commuters nga kunta hay maintindihan sanda sa hirit nga pagtaas it pamasahe.
Madumduman nga nauna eon nga ginpasugtan it Land Franchising and Regulatory Board (LTFRB) ro piso nga provisional increase sa pamasahe sa jeep.
Pilang adlaw pa eamang ro nagtaliwan, mabahoe eagi ro ginsaka sa presyo it diesel ag gasolina rason nga insigidang nabalewala ro pisong ginsaka.
Fuel subsidy ro bulig it gobyerno bilang sabat sa mga driver ag operators apang maabu pa kanda ro owa pa nakabaton it ayuda.
Sa makaron , ro mahimo eamang hay makaangkon it kanya-kanyang diskarte agud nga maskin paalin hay may mai-gastos anay sa kinahangeanon.
Ginabantayan man ro magiging aksyon kara angot sa masunod nga administrasyon.
