Hugut ro naging bilin ni Pangueong Rodrigo Duterte sa magabueos kana nga si incoming president Ferdinand Marcos Jr. nga padayunon ro away sa ilegal nga droga.
Raya hay para man sigon sa paeaabuton it maabu nga pamatan-on.
Maskin nga pilang adlaw eon lang ro nabilin sa termino ni Pangueong Duterte, aminado imaw nga owa nana eubusan nga natapna ro droga.
Kadungan sa amat-amat nga paghaeuga it sitwasyon sa nasyon angot sa pandemya it COVID, mataeupangdan nga nagiging aktibo eon man ro mga sindikato sa droga.
Pamatuod kara ro mga ginpatigayon nga drug operations it nagkaeain-eain nga ahensya it gobyerno, mabahoe nga bulto eon man it ilegal nga droga ro nadakpan.
Ginapakita eamang kara nga naga-umpisa eon man ro operasyon it mga raya.
Posibleng naga-fiesta eon man ro mga sindikato bangud nga nagapahalin eon si Pangueong Duterte.
Ginpahayag man ni incoming president Bongbong Marcos nga maskin nga pagapadayunon nana ro naumpisahan nga away kontra sa droga, paga-obrahon nana raya sa anang kaugalingon nga pamaagi.
Maga-focus imaw sa prevention ag educational process sa maeain nga epekto it ilegal nga droga.
Nagakinahangean man sigon nga mapa-umwad ag ma-modernize ro rehabilitation center sa nasyon.
Sambilog sa legacy nga paga-aywan ni Duterte hay ro war on drug, nga maskin nga naputos it mga kontrobersya hay nakabatyag it grabeng kahadlok ro mga eakot kara.
Kon indi masolusyunan , ro iligal nga droga ro kaeabanan nga ginahalinan it nagakatabu nga grabe ag makangieidlis nga krimen.
