Ginregaluhan it anwang it anang tatay ro sangka pitong dag-on nga ongang eaeaki nga nagselebrar sa anang kaadlawan ko adlaw it Biyernes, Hulyo 1.
Si Prince Daniel Sernicula it Brgy. Cabladan, Sibalom, Antique hay kaantiguhan eon nga mag-eawig ag magpakaon it anwang sa edad nga pitong dag-on rason nga raya ro naisipan it anang tatay nga si Danny Sernicula, sangka kagawad sa lugar nga iregalo kana.
Ginpahayag ni Danny sa interview it Bombo Radyo nga panguma sa bukid ro andang pangabuhian kon siin maabong tinuean-on ro andang mga pananom rason nga babayeng anwang ro anang ginregalo sa onga mag-eowas sa cake ag ro DIY nga birthday greetings nga human sa ginpasunod nga bunga it kamatis.
Plano sigon ni Daniel nga paabuon ro anwang nga naga edad eon makaron it limang dag-on agud nga gamiton sa panggastos sa anang pag-eskwela kon siin imaw ro kamanghuran sa waeong ka magmaeanghod.
