KALIBO, Aklan–Posible nga may igabueos nga mas makapamayad sa nasyon si Pangueong Ferdinand Marcos Jr. kasunod sa anang pagpaguwa it Executive Order nga nagamando sa pag-abolish sa Presidential Anti-Corruption Commission (PACC) ag Office of the Cabinet Secretary.
Raya ro ginpahayag it sangka batikang abogado sa Aklan nga si Atty. Plaridel Morania kon siin raya ro unang EO nga ginpaguwa it presidente sa sueod it pitong adlaw pa eamang nga pagpungko bilang lider it nasyon.
Ginpaathag ni Atty. Morania nga may positibo ag negatibong epekto ro ginhimo ni Marcos Jr. partikular nga uwa eon it ahensya nga ginakahadlukan ro mga empleyado it gobyerno nga maga-usisa sa andang aktibidad nga may kaangtanan sa corruption.
Apang, dapat man sigon nga taw-an it kahigayunan ro pangueo nga ipakita ro anang ikasarang ag kon anu pa ro anang mahimo sa anang unang termino.
Nasayuran nga ro PACC hay gintukod sa bisa it E.O. 43 series of 2017, para disiplinahon ag kakason ro mga public officials ag empleyado it gobyerno, mag-eowas eon lang ro mga bukon it sakop sa otoridad kara.
